Muqdisho,(insidesomalia.org) - Madaxweynaha Soomaaliya Cabdullaahi Yuusuf Axmed ayaa daboolka ka qaaday in guddoomiyaha Gobolka Banaadir Maxamed Cumar Xabeeb (Maxamed Dheere) uu howlihiisa wadan karo, isla markaana aan la casili karin.

Madaxweyne Yuusuf ayaa gabi ahaan gaashaanka ku dhuftay xil ka qaadistii lagu sameeyay Maxamed Dheere, isagoo ku tilmaamay mid aan sharciga loo soo marin, wuxuuna sheegay in marka hore ay tahay in la diyaariyo maamul badala inta aan xilka laga qaadin.

"Qoraalkii lagu casilayay Duqa Muqdisho weli ma uusan saxiixin Madaxweynuhu, taasoo muujinaysa inuu ka biyo diidan yahay xil ka qaadista duqa Muqdisho" ayuu saxaafada u sheegay mid ka mid ah guddoomiyayaasha Gobolka Banaadir oo muujiyay inuu la safan yahay guddoomiyihiisa.

Arrintaan ayaa sababtay khilaaf aad u xooggan oo soo dhexgalay Madaxweynaha Somalia Cabdullaahi Yuusuf Axmed iyo Ra'iisul wasaarihiisa Nuur Xasan Xuseen (Nuur Cadde) iyadoo khilaafkoodan uu qarka u saaran yahay in baarlamaanku tuuro Nuur Cadde.

Ra'iisul wasaaraha Somalia ayaa horay u sheegay inuu u cuskaday xil ka qaadista Nuur Cadde isagoo wax ka qaban waayay nabada caasimada iyo isagoo eedeymo fara badan loo soo jeediyay.

Guddoomiyaha gobolka Banaadir ee khilaafka dhexdhigay mas'uuliyiinta DFKMG ah ayaa isaguna aamisan in xil ka qaadistiisa aysan ahayn mid loo maray dhanka sharciga, balse laga soo min-guuriyay deegaano kale.